انا من رمضان الماضي و انا افكر في كتابة شي عن المسلسلات. لكني ما عرفت كيف ابدأ. ابدا بالقصه التافهه؟ والا بالتمثيل المتصنع الغبي؟ والا بالملابس الـ.. ما اعرف اوصفها ؟ والا الاخراج المتخلف؟ والا الحوار الممل المطول التافه؟
لكن فكرت و قلت خلهم كيفهم. كل واحد ينتج عمله على قد عقله. من زين الكتاب والا المخرجين اللي عندنا اصلاً. المشكله في الناس اللي تتابع. لليوم ما اصدق ان ممكن الله يخلق شي اسخف من المسلسل نفسه.

انا اعتذر لاني طولت. لكن ما انلام والله . صارت لي سنين و انا حابس هالقهر داخلي. لكن على العموم مثل ما يقول عنوان الموضوع راح اتوجه شوي بعيد عن السلبيه هالمرة حتى ما يفكر الناس اني اقشر و ما يعجبني شي.

انا مثل ما قلت غاسل يدي من التلفزيون من زمان. لكن البارحه كلمني واحد من الشباب و قال لي يا احمد رح شوف هالبرنامج. قلت له من يقدمه؟ قال لي احمد الشقيري. و عندها تذكرت احمد الشقيري. ما شفته السنه الماضيه لكن اتذكر لما قدم برنامجه مع حمزه يوسف و راحوا امريكا و تعرفوا على المسلمين هناك و غيره. كان يعجبني جدا هذا البرنامج.

هذي السنه الشقيري راح وين؟ الشقيري راح اليابان. حاول يوصل حضارة اليابان لنا. للي ما يعرفني ترى من الناس اللي تضحكون عليهم لما تشوفونهم يقرون قصص مصورة يابانية و اتابع انيمي. لكن هذا ما كان السبب اللي خلاني احب البرنامج. احمد عرض برناممجه تحت هدف حلو. مجرد انه يقارن بيننا و بين اليابانيين. من حيث احترامهم للناس او حبهم لشغلهم او حبهم للنظافه او احترامهم لذوي الاحتياجات الخاصه.

كل الحلقات حلوه صراحه. والحمدلله كلها موجوده على يوتيوب. احترت اي حلقه احط. لكن هذي الحلقه عجبتني شوي اكثر من غيرها.

اوه نسيت .. البرنامج اسمه خواطر و هذا الجزء الخامس.

امممـ .. ما عجبني الموضوع اللي كتبته. الكلام السلبي فيه اكثر من الايجابي ! شكلي برجع امسح شوي

والا تدرون شلون .. خلوهم يستاهلون الكلام


تفضلوا حلقة خواطر رقم 6